舒利亞獻計　阿仙奴想捧盃要先做一件事

阿仙奴喺歐聯4強出局後，今季又四大皆空，撇開社區盾，對上一次贏得重要錦標已經係2020年英足盃，英格蘭傳奇前鋒舒利亞獻計，指如果兵工廠想一嘗冠軍滋味，必須簽入1位頂級中鋒射手。

舒利亞話：「開季時候，我已經講過阿仙奴需要簽入1位中鋒，先至可以取得佳績，甚至問鼎冠軍，其實佢哋可以打入歐聯4強，現時排英超第2位，整體實力已相當唔錯，只要再簽入2、3位優秀球員就足夠，首選一定係中鋒，如果阿仙奴下季想捧英超或者歐聯冠軍，就必須咁做，其他球會正在積極尋找射手，阿迪達今夏一定好忙碌。」

阿仙奴前鋒加比爾捷西斯今季長期受傷，需要由中場夏維斯客串中鋒，點知呢位德國國腳都傷埋，結果要由另1位中場米基爾馬連奴改踢前鋒，阿仙奴今夏簽入新射手，的確刻不容緩。