利華古遜再受重創　華迪斯同意加盟拜仁

利華古遜教練沙比阿朗素表明將於今夏離隊後，隊內天才新星科利安華迪斯亦準備走人，根據德國《圖片報》爆料，呢位22歲中場拒絕續約，並已同意加盟拜仁慕尼黑，拜仁將會向利華古遜提出以1億歐元(約8.75億港元)收購科利安華迪斯。

科利安華迪斯仍有2年合約在身，受到曼城、皇馬、拜仁慕尼黑等大球會垂青，據悉呢位德國國腳只有興趣加盟拜仁，並接受對方開出嘅個人待遇條件，等拜仁同利華古遜傾掂轉會費，就可以完成交易。

身為今季德甲冠軍嘅拜仁慕尼黑願意開出1億歐元收購科利安華迪斯，利華古遜方面要求1.2億歐元，但相信雙方仍然有好大機會達成協議。

科利安華迪斯出身於利華古遜青訓系統，近2季成為球隊主力，今季上陣43場入16球及13次助攻，曼城主帥哥迪奧拿希望簽入佢，接替奇雲迪布尼，但被昔日愛將兼現任拜仁教練高柏尼「截胡」。