阿仙奴今夏首簽曝光　「新洛迪」答應加盟

阿仙奴今季又四大皆空，會方計劃今夏再增兵提升實力，根據「轉會權威」記者羅曼諾(Fabrizio Romano)爆料，兵工廠已經同皇家蘇斯達中場蘇比文迪，達成口頭協議，將斥資6,000萬歐元(約5.2億港元)收購呢位26歲西班牙國腳。

蘇比文迪踢法似曼城中場洛迪卡斯簡迪，並有份協助西班牙奪得上年歐國盃冠軍，獲得利物浦、曼聯、阿仙奴、拜仁慕尼黑等多間球會垂青。利物浦上年夏天幾乎簽入佢，但呢位「新洛迪」熱愛皇蘇所在嘅巴斯克地區食物，以及喜愛喺當地行山，拒絕加盟紅軍。

不過，時移世易，蘇比文迪已準備好出國搵食，依家同意入「廠」，好大程度上因為阿仙奴主帥阿迪達係西班牙人，隊內仲有2位國家隊隊友米基爾馬連奴、大衞拉耶，令佢選擇加盟兵工廠。蘇比文迪現時合約有6,000萬歐元毀約金條款，阿仙奴會直接用呢個金錢買斷佢。