爛賭球王閃電開紀錄　紐卡素挫車路士

英超早場，「喜鵲」紐卡素憑辛度東拿利「閃電」開紀錄，主場2比0擊敗10人應戰嘅車路士，取得關鍵3分，贏波後升上第3，歐聯入場券即將到手，反觀車路士今場「6分波」落敗，雖仍然排第5，但優勢所餘無幾。

紐卡素一開波即藉主場之利搶攻，僅2分鐘中場辛度東拿利喺車仔後場反搶成功，積及梅菲於右路傳中，曾自認係「病態賭徒」嘅東拿利即衝入禁區入楔破網，極速打開紀錄。

戰至35分鐘車仔再受打擊，尼高拉斯積遜中場爭波「批肘」侵犯保治文，球證經過VAR覆核，將尼高拉斯積遜直接紅牌驅逐出場，按規定「直紅」停賽3場，車仔餘下兩場聯賽對曼聯同諾定咸森林，尼高拉斯積遜都要停賽，可以專心準備月底對貝迪斯嘅歐協聯決賽。

作客落後1球兼打少個嘅車仔，餘下時間無力反撲，紐卡素在90分鐘憑般奴古馬雷斯射入「世界波」擴大比數，最終紐卡素贏2比0完場。