曼聯「習慣輸波」跌落尾5　艾摩廉：搞唔掂我會辭職

全力爭奪歐霸冠軍嘅曼聯，喺英超表現持續沉淪，周日(11日)主場0比2不敵韋斯咸後，又創出一堆羞家紀錄。領隊魯賓艾摩廉賽後表示，曼聯球員陷入「習慣輸波」嘅危險情況，表明如果自己未能扭轉情況，將會辭職讓位其他有能之士。

曼聯近7場聯賽不勝(2和5負)，追平球隊喺英超最長不勝走勢；今場係曼聯今季第9場聯賽主場敗仗，亦追平球會喺頂級聯賽主場輸波紀錄，對上一次單季聯賽9次主場輸波，已經係62/63球季。曼聯依家排聯聯賽第16位，比歐霸決賽對手熱刺高1位，可謂難兄難弟。

雖然話英超冇嘢好爭，但艾摩廉對球隊表現仍非常失望：「我唔想講球員，而係講自己同球會文化，曼聯需要一個好強勢嘅夏天去扭轉局面，如果下季仲踢成咁，個帥位應該另覓賢能。依家係曼聯歷史關鍵時刻，我哋失去大球會嘅感覺，甚至覺得主場輸波都冇乜所謂，習慣呢種感覺係非常危險，呢個係我嘅責任，如果我唔可以盡快執番正，領隊位置應該交畀第2個人。」