曼聯知醜？若奪歐霸冠軍　搞BBQ代替巡遊

曼聯今季錄得英超史上最差成績，打破多項羞家紀錄，雖然下星期嘅歐霸盃決賽有機會「一鋪翻身」，不過就算佢哋真係捧盃，球會亦決定要低調慶祝，只係喺卡寧頓訓練基地搞BBQ慶功宴，代替豪華鋪張嘅巴士勝利巡遊。

英國《太陽報》報道，曼聯如果喺今月22日凌晨擊敗熱刺贏歐霸盃冠軍，都唔會舉行勝利巡遊，而係喺第2日返訓練基地搞BBQ，到時職員、球員可以帶埋屋企人一齊出席。據悉呢個決定同老闆拉特克利夫之前取消聖誕派對嘅「慳錢計劃」無關。

低調舉行BBQ代替勝利巡遊，一來係因為今季英超成績太羞家，唔適宜過份鋪張，而另外一個原因，係曼聯季尾行程太緊密，踢完決賽後3日就要進行聯賽煞科戰，完季又即刻飛去馬來西亞同香港踢表演賽，完成亞洲之旅返嚟，一眾國腳就會返國家隊踢國際賽，基本上冇時間搞勝利巡遊。