C朗缺陣仲好　艾納斯狂勝9球

周二(13日)凌晨沙特阿拉伯聯賽出現驚人賽果，艾納斯缺少巨星C朗，表現反而更加醒神，作客以9比0狂勝艾科多，沙迪奧文尼成為主角射入4球，職業生涯首次食「大四喜」，難怪唔少網民認為艾納斯唔好同C朗續約，以免阻礙球隊下季爭標。

由於艾納斯爭標無望，加上C朗有輕傷在身，教練皮奧利並冇揀選佢入大軍名單，但並冇影響球隊攻力，開賽16分鐘就由艾曼耶亞射入打開紀錄。跟住祖漢杜蘭、波索域各入1球，加上沙迪奧文尼射入12碼，艾納斯上半場已領先4球。

排尾二嘅艾科多換邊後僅2分鐘，仲有門將被逐，更加無招架之力，艾納斯由祖漢杜蘭再建一功，沙迪奧文尼連入3球，食出「大四喜」，加上穆罕默德馬蘭補時射入12碼，狂贈對手9蛋，結束各項賽事2連敗，艾納斯追平沙特聯賽史上最懸殊比數紀錄，15次射門中目標更加史上最多。

艾納斯缺少C朗，攻力有增無減，網民紛紛認為佢可以放心提早放假抖暑，呢位40歲葡萄牙國腳將於今夏約滿，據悉續約談判出現阻滯，去留成疑。