離開皇馬各自飛　安察洛堤囝囝有望教格流

安察洛堤月底離開皇家馬德里，將會接任巴西國家隊領隊，佢嘅囝囝大衞安察洛堤跟爸爸搵食多年後，亦準備趁今次機會「單飛」。據西班牙《阿斯報》報道，35歲嘅大衞已獲蘇超名牌格拉斯哥流浪斟介，有望首度成為球隊主帥。

大衞過去一直同爸爸以「父子檔」搵威，一齊效力拜仁慕尼黑、愛華頓、拿玻里同依家嘅皇家馬德里，隨住安察洛堤離隊，大衞亦要另尋出路。一直負責為爸爸做數據分析嘅大衞，之前試過客串代爸爸領軍，喺業內獲得唔少好評。

格拉斯哥流浪2月份搵巴利費格遜做臨時領隊，夏天要另覓人選，之前傳過搵前愛華頓領隊戴治，但依家就將大衞列為頭號目標。大衞亦皇帝女唔憂嫁，消息指意甲新貴科木如果失去教練法比加斯，亦想搵大衞接手。