阿諾特替身曝光！利物浦即將簽入費林邦

英超冠軍利物浦球季未完，已開始為下季衞冕做準備，據德國《天空體育》報道，「紅軍」同利華古遜右閘謝利美費林邦已進行深入談判，利物浦將會啟動佢合約內3,500萬鎊(約3.6億港元)買斷條款，由佢接替離隊嘅阿歷山大阿諾特。

阿諾特將以自由身轉會皇家馬德里，右閘成為利物浦買人當務之急，而助攻力強嘅費林邦就係領隊施洛心儀人選。呢位24歲右閘合約設有3,500萬鎊買斷條款，佢嘅經理人林馬治周二(13日)就喺社交網暗示「談判中」，更用漏斗emoji寓意「最後倒數」，似回應「接近加盟利物浦」嘅傳聞。

事實上，荷蘭國腳費林邦喺上年回應利物浦斟介傳聞，已經預先「放風」：「利物浦係一間好有歷史嘅偉大球會，呢個(為利物浦效力)會係好好嘅事，邊個知道未來會點樣發展？」費林邦今季喺德甲上陣33次，交出5個入波同5次助攻。