意甲都踢唔掂　基爾獲加面臨「失業」

曼城右後衞基爾獲加今年1月底被外借去AC米蘭後，表現每況愈下，根據「轉會權威」記者羅曼諾(Fabrizio Romano)爆料，「藍月亮」無意收回呢位即將35歲嘅老將，AC米蘭亦冇打算買斷佢，基爾獲加面臨「失業」，可能焗住去美職搵食。

基爾獲加轉投AC蘭後一度受傷，各項賽事僅上陣15次，並冇入波或者助攻，並且多數擔任後備，作用非常有限，加上呢位右閘已屆退役年齡，預料A米唔會啟動500萬歐元(約4,300萬港元)買斷條款收購佢。

尤其是基爾獲加周薪高達17.5萬鎊(約175萬港元)，除非佢肯定大幅減人工，否則即使免轉會費，A米都唔會簽佢。羅曼諾指曼城今夏100%放走基爾獲加，令佢面臨冇球會收留嘅尷尬局面。

據悉基爾獲加當時選擇被外借去AC米蘭，其中一個原因係要逃避情婦真人騷女星盧琳狙擊，估計佢唔想重返英格蘭踢波，比較大機會遠赴生活文化比較接近嘅美職，由英格蘭名宿碧咸做班主嘅國際邁亞密或者有興趣簽基爾獲加。