巴塞留用冠軍功臣　費歷克、拉芬夏齊續約

巴塞隆拿喺「國家打吡」贏波後，西甲冠軍即將到手，球隊內部再傳出好消息，據報教練費歷克同巴西球星拉芬夏比洛尼都傾掂續約，確保巴塞隆拿盛世可以延續。

西班牙《世界體育報》報道，上年加盟執教嘅費歷克，合約到明年到期，雖然呢位德國教頭一直堅持「簽短約」，但佢喺巴塞執教相當愉快，決定延長1年合約到2027年夏天，經理人薩哈維喺周一(12日)同巴塞會長拉波塔已達成協議，等待合適時間公布。

更大喜訊係，今季踢到美斯咁款嘅拉芬夏比洛尼，據報亦已同意續約到2029年。巴塞上年曾打算出售呢位巴西翼鋒，希望趁年底就29歲嘅佢喺最高市場價值嘅時間出售，唔少沙特球會都對佢有興趣，不過拉芬夏今季各項賽事製造57球，證明佢喺陣中不可或缺嘅地位，令巴塞決意同佢續長約。