皇馬爆兵變　洛迪高高斯「罷踢」博轉會

皇馬上場西甲「國家打吡」不敵巴塞隆拿後，爭標機會渺茫，屋漏偏逢連夜雨，現時更傳出兵變，前鋒洛迪高高斯不滿失去主力地位，拒絕踢今季餘下賽事，明顯「博炒」轉投其他球會。

根據西班牙《馬卡報》爆料，洛迪高高斯唔只拒絕續約，甚至唔想再踢今季餘下賽事，皆因基利安麥巴比今季加盟後，洛迪高高斯成為鋒線副選，加上另外2位進攻球員雲尼斯奧斯祖利亞、祖迪比寧咸屬於必然正選，令呢位24歲巴西國腳感到留隊前景悲觀，希望轉會尋找新發展。

西班牙媒體《Relevo》指洛迪高高斯喺近日開操僅5分鐘，就通知教練安察洛堤，話自己感到不適，然後離開，事後傳出佢「提早收咧」唔會踢餘下3場西甲對馬略卡、西維爾、皇家蘇斯達。

不過，安察洛堤表示，洛迪高高斯只係感到腳部不適，除此之外並冇其他事情發生。近期盛傳多間球會有興趣簽入洛迪高高斯，包括曼城、利物浦，如果佢提出轉會，不愁出路。