曼城加碼「截胡」拜仁 華迪斯抵英國傾合約
早前傳出拜仁慕尼黑已經斟掂利華古遜天才中場科利安華迪斯,但事情出現大逆轉,根據德國《圖片報》爆料,曼城加碼開出1.5億歐元(約13億港元)轉會費「截胡」,呢位22歲德國國腳被影到同父母飛抵曼徹斯特,疑似同「藍月亮」討論加盟事宜。
據悉利華古遜同曼城關係良好,呢支英超豪門出手亦比拜仁闊綽,願意以1.5億歐元收購科利安華迪斯,比拜仁出價多50%。加上利華古遜亦唔想呢位猛將轉投其他德甲勁敵,所以更傾向將科利安華迪斯出售畀曼城。
「轉會權威」記者羅曼諾(Fabrizio Romano)指,科利安華迪斯趁近日放假同父母飛去英國,會見曼城代表,更傳出領隊哥迪奧拿都有份加入談判。「藍月亮」不惜重金搶購科利安華迪斯,皆因要搵1位具級數中場接替今夏離隊嘅奇雲迪布尼。
此外,利華古遜希望簽入曼城中場占士麥艾迪,呢位22歲英格蘭新星可能成為今次交易條件之一。