沙比想帶愛將過皇馬　利華面臨被拆骨

利華古遜教練沙比阿朗素將於今夏離隊，轉投皇家馬德里，西班牙各大傳媒爆料，呢位43歲少帥希望帶埋左後衞阿歷斯基莫度過檔。加上科利安華迪斯、莊拿芬泰希、謝利美費林邦都可能離隊，利華古遜面臨被拆骨。

由於皇馬左閘費蘭特文迪經常受傷，隊內缺乏其他選擇，據悉沙比阿朗素接掌「銀河艦隊」帥印後，將會首先考慮簽入左後衞。阿歷斯基莫度效力利華古遜2季，表現出色，今季上陣47場入4球及13次助攻，成為沙比阿朗素愛將，加上佢係西班牙人，轉戰西甲可以快速適應新環境，估計29歲嘅阿歷斯基莫度現時身價為4,000萬歐元(約3.5億港元)，皇馬絕對買得起。

至於科利安華迪斯好可能轉投曼城，巴塞隆拿睇中莊拿芬泰希，謝利美費林邦成為利物浦收購目標，加上沙比阿朗素離隊，恐怕利華古遜下季前景唔樂觀。