老婆去意大利睇樓　奇雲迪布尼準備加盟拿玻里

曼城中場奇雲迪布尼將於今夏約滿離隊，去向備受關注，根據意大利傳媒爆料，呢位33歲比利時國腳嘅老婆米歇爾，近日前往那不勒斯了解居住環境，外界推測奇雲迪布尼好可能加盟意甲勁旅拿玻里。

據悉米歇爾去到拿玻里所在城市那不勒斯睇樓，觀察數個豪宅，態度非常認真，似乎已準備全家搬去當地生活。事實上，近期已傳出拿玻里希望簽入奇雲迪布尼，向佢開出2年合約，並可以優先續約1年。雖然有沙特阿拉伯、美職球會想簽入奇雲迪布尼，但佢傾向留喺歐洲，令拿玻里「搶人才」大戰佔上風。

拿玻里教練干地對英超兵情有獨鐘，上年夏天簽入曼聯中場麥湯米尼、白禮頓中場比利基莫亞，早前亦傳出想收購曼城翼鋒基亞利殊，依家又向奇雲迪布尼埋手。