曼聯又取消年度頒獎禮　般費挑戰C朗紀錄

曼聯近年成績低迷，今季英超排名更係史上最低，據報球隊亦覺得太肉酸，決定連續第2年取消年度頒獎禮。被視為「畢樹比最佳球員獎」大熱嘅般奴費南迪斯，可能只能夠喺煞科戰賽前搞個簡單頒獎儀式。

英國《泰晤士報》報道，曼聯往常5月份，都會喺奧脫福舉行晚宴兼進行頒獎，不過上年因為「慳錢」同「成績差」，決定取消晚宴，而今季曼聯情況只有更差，所以決定連續第2年取消頒獎禮。曼聯官網已呼籲球迷投票，選出「畢樹比最佳球員獎」、最佳青年球員同最佳金球等獎項。

般奴費南迪斯上年第3度獲得「畢樹比最佳球員獎」，呢位葡萄牙球星亦係今年大熱門，如果佢順利第4度獲獎，就可以追平C朗拿度同迪基亞4度封王紀錄。消息指曼聯將喺月底煞科戰，主場對阿士東維拉賽前進行簡單頒獎儀式。