利物浦雄心勃勃　驚爆搶簽科利安華迪斯

英超新科冠軍利物浦，球季未完已積極為衞冕做準備，多個權威媒體證實，利物浦已加入爭奪德國中場科利安華迪斯，有望連埋另一利華古遜球星謝利美費林邦一齊「打包」。

德國新星科利安華迪斯近期成為搶手貨，拜仁慕尼黑同曼城率先出手，據報華迪斯嘅爸爸媽媽近日飛抵英國，已同曼城高層會面，不過就未同哥迪奧拿見面。據德國《踢球者》爆料，利物浦亦已加入戰團，一樣同華迪斯父母溝通過，準備好搶人。

權威記者David Ornstein周三(14日)爆料：「利物浦已經同華迪斯接洽，表明如果佢想轉會以及轉戰英超，佢哋將會提出收購。利物浦對華迪斯垂青已久，但暫時未知道華迪斯會唔會離開利華古遜或者德國。」消息指華迪斯嘅轉會費高達1.5億歐元。