紅魔棄將成搶手貨　皇馬想簽天才左閘

曼聯上年將左後衞艾華路費南迪斯出售畀賓菲加後，呢位22歲西班牙新星表現大勇，近期更獲得皇馬垂青，希望將佢收歸旗下。

艾華路費南迪斯出身於曼聯青年軍，但升上一隊後不獲重用，上年1月被外借去賓菲加，呢支葡超勁旅上年夏天正式以510萬鎊(約5,100萬港元)買斷佢。艾華路費南迪斯今季成為賓菲加主力，上陣48場入4球及5次助攻，踢法攻守兼備，引起皇馬關注。

由於曼聯有權以1,530萬鎊回購艾華路費南迪斯，如果皇馬要直接簽入佢，可能受對方阻礙，所以皇馬計劃同紅魔鬼合作，希望曼聯運用回購權買番艾華路費南迪斯，「銀河艦隊」再以2,700萬鎊收購呢位新星。皇馬既可以簽到心頭好，曼聯亦能夠從中獲利，達到雙贏。

艾華路費南迪斯曾於皇馬青年軍受訓，之後轉投曼聯，估唔到現時又可能重返「銀河艦隊」。