多蒙特神奇爆發！戲劇性奪歐聯參賽資格

德甲周六(17日)煞科，聯賽第4名爭奪成為焦點所在，今季一度跌到第11位嘅多蒙特，喺主場3比0大勝基爾，加上原本排第4位嘅弗賴堡輸波，多蒙特得以從後趕上，拎到下季歐聯參賽資格，季中上任嘅教練尼高高華就成為球迷英雄。

多蒙特上半季由紐尼沙軒領軍，成績令人失望，尼高高華2月份接手後亦未見起色，3月份輸畀RB萊比錫後跌到落11位，當時冇人認為多蒙特可以踢歐聯。不過，「蜜蜂兵團」之後突然醒覺，最後8輪聯賽拎到7勝1和成績，煞科日戲劇性衝入前4名。

多蒙特大勝基爾後，主場球迷不斷高唱尼高高華個名，呢位克羅地亞教練表示：「我好開心可以達成目標，足球從來唔係單憑一個人就可以得到成功，而係要所有人一齊努力，當然包括埋球迷，我為球員嘅表現感到自豪。」

多蒙特拎到歐聯最後一張入場券，弗賴堡會踢歐霸盃、緬恩斯就出戰歐協聯，最令球迷驚訝嘅係，RB萊比錫喺煞科戰輸畀史特加後，將會自16/17球季之後，首次緣盡歐洲賽事。