沙拿罕見空門失機　續肥約後大跌Watt

利物浦今季英超封王，埃及前鋒穆罕默德沙拿絕對係關鍵人物，佢嘅28個入波同18次助攻近乎「屈機」。不過，自從沙拿4月初續約後，表現突然極速滑落，周二(20日)對白禮頓更罕見出現空門失機畫面，同英超史上最高入球紀錄仍然差1球。

英超史上最高入球貢獻(入波+助攻)紀錄，係舒利亞同高爾共同保持嘅47球，沙拿喺3月對修咸頓梅開二度後，已經達到44球，全世界都認為佢破紀錄係遲早問題。但係自從4月初同利物浦達成38萬鎊周薪新約協議後，呢位下月就33歲嘅射手突然「減產」，近8場聯賽只得1入波同1助攻，仍然同紀錄相差1球，煞科戰對水晶宮成為最後機會。

沙拿今場對白禮頓有黃金機會，54分鐘接應傳中，門前7碼對住空門竟然射斜，領隊施洛賽後表示：「沙拿今季踢出超乎人類嘅表現，但每季梗有啲時候會變番凡人。沙拿唔係未試過連續2場冇波入，但好少發生，就算真係發生，你都會相信佢好快就會入番波。」