隊長「另類戴帽」　圓滿告別13年水晶宮生涯

周三(21日)凌晨英超，新鮮出爐嘅英足盃冠軍水晶宮繼續發威，主場以4比2擊敗狼隊，今仗亦係水晶宮隊長祖爾禾特最後1次為呢支倫敦球隊主場比賽，呢位35歲後衞一星期內，經歷女兒出世、奪冠、主場贏波謝幕，上演「另類帽子戲法」。

狼隊由中堅艾巴度頭槌破網打開紀錄，但水晶宮迅速憑前鋒尼基迪亞梅開二度，反超前2比1。換邊之後，水晶宮左閘芝維爾主射罰球省中人改變方向入網，拉開紀錄，雖然狼隊由前鋒佐真拿臣頂入角球追番1粒，但水晶宮憑狀態大勇嘅伊比爾治伊斯射成4比2，呢位26歲英格蘭國腳近6次上陣都有波入。

賽後水晶宮球員列隊，為祖爾禾特舉行告別儀式，呢位中堅2012年由樸茨茅夫加盟水晶宮，一直效力至今，累積上陣364場，並有6個入波及10次助攻。祖爾禾特上周四(15日)迎接女兒出世，2日後協助水晶宮奪得今屆英足盃冠軍，彌補2016年決賽輸波遺憾，加上今仗主場贏波謝幕，可以話係完美大結局。