比寧咸世冠盃後做手術　缺席下季西甲開鑼

皇家馬德里今季失落西甲冠軍，夏天將由沙比阿朗素接掌帥印，不過今季未完已經先有壞消息，英格蘭中場祖迪比寧咸會喺世冠盃後進行膊頭手術，預計要缺陣3個月，意味下季西甲開季都唔使預佢。

比寧咸喺2年前曾經膊頭甩臼，雖然養傷後可以繼續比賽，但醫生建議佢要做手術徹底根治，否則會有極高嘅復發風險，只係佢一直搵唔到空檔處理。據《The Athletic》報道，比寧咸已決定喺世冠盃完結後即刻做手術，預計休養期為3個月。

世冠盃決賽會喺7月中舉行，如果皇家馬德里殺入決賽，比寧咸做手術後可能要到抖到10月，錯過所有備戰同新球季開季。比寧咸早前表示對世冠盃志在必得：「世冠盃好重要，係我哋希望贏到嘅錦標，呢個係球會嘅夢想，尤其經過咁差嘅球季後，呢個錦標就更加重要。」