葡萄牙點兵歐國聯　18歲天才獲譽「新時代標誌」

葡萄牙周三(21日)為下月嘅歐國聯點兵，老將C朗拿度繼續入選負責領軍，最令球迷驚喜嘅係，18歲天才洛迪高摩拉首度入選，更獲領隊馬天尼斯大讚係「葡萄牙新時代標誌」。

葡萄牙喺歐國聯4強對德國，入到決賽嘅話就鬥法國或西班牙，馬天尼斯點兵亦精銳盡出，40歲嘅C朗拿度仍然擔大旗，般奴費南迪斯、貝拿度施華、迪亞高祖達等8個英超兵都有入圍。

最有驚喜係波圖18歲進攻中場洛迪高摩拉，佢今季葡超上位，23場聯賽有10個入波同4次助攻，馬天尼斯表示：「講親佢我都一定會面露笑容，佢會係葡萄牙新時代嘅標誌！」