咩玩法？C朗可能轉投巴甲球隊

葡萄牙國腳C朗同沙特豪門艾納斯仍然未能達成續約協議，根據西班牙《馬卡報》爆料，有巴甲球會乘虛而入，計劃簽入呢位40歲射手，出戰下月展開嘅世冠盃。

C朗將於今夏約滿，由於艾納斯無緣下屆亞冠精英盃，令雙方續約談判出現阻滯，因而吸引有份參加今屆世冠盃嘅巴甲球隊注意，想簽入呢位超級巨星。《馬卡報》並冇公開相關巴甲球會名字，有份參加今屆世冠盃嘅巴西球隊，包括法林明高、彭美拉斯、富明尼斯、保地花高。

當中以法林明高最有可能簽入C朗，因為會方近期積極增兵，將簽入阿仙奴中場佐真奴費路，並想向車路士借用祖奧菲歷斯，如果簽埋C朗，意味呢位2位葡萄牙國腳有望合作。

不過，唔少網民比較希望C朗加盟彭美拉斯，因為彭美拉斯、國際邁亞密喺世冠盃同組，佢將可以同宿敵美斯交鋒。