孫興民苦等10年圓冠軍夢：我係熱刺傳奇！

熱刺贏歐霸盃打破17年冠軍荒，最感動嘅人非隊長孫興民莫屬，呢位南韓球星效力熱刺10年從未奪冠，甚至未曾喺職業生涯贏過任何成年賽事冠軍。當多年戰友哈利卡尼都選擇離隊實現冠軍夢想，孫興民仍堅持為熱刺效命，最終夢想成真，佢賽後亦豪言：我係熱刺嘅傳奇！

32歲嘅孫興民2015年加盟熱刺，同哈利卡尼組成英超其中一對最強前鋒組合，21/22球季做過英超神射手，係熱刺史上入波第5多球員，可惜一直同冠軍無緣。哈利卡尼2年前轉投拜仁慕尼黑，今季喺德甲實現冠軍夢，但接任隊長嘅孫興民就證明，留喺熱刺都可以捧到盃。

孫興民職業生涯從未贏過成年賽事冠軍，「最叻」嗰次只係幫南韓U23贏亞運足球金牌，依家喺熱刺名留青史，佢賽後亦收起以往嘅含蓄：「我係熱刺傳奇！點解唔係？過去17年冇人做到過(為熱刺奪冠)，所以今日我會話自己係熱刺傳奇。今日夢想成真，我好開心！」