般費萬念俱灰：曼聯想套現可以賣走我

曼聯爭奪歐霸盃失敗，全隊萬念俱灰，來季仲要面對財政黑洞，隊長般奴費南迪斯坦言，如果曼聯要套現，可以將佢出售。

較早前報道，沙特豪門希拉爾有意簽入該位30歲葡萄牙中場，開價高達2億鎊(約21億港元)，打算同般費簽3年約，不過曼聯同般費一直冇應承。不過情況有變，隨住歐霸盃爭標失利，失落歐聯資格，來季將損失1億鎊潛在收入(約10.5億港元)，令曼聯必須面對現實，考慮出售主力續命。

般費爭冠失利後心灰意冷，向傳媒發表離隊言論：「我一直好誠實，如果球會想套現，就照做吧，足球有時就係咁，我講過我會留喺度，直到球會同我講要我離開。我亦想做更多，帶領球隊成功。」

「當有一日，球會認為我越界，或者認為我係時候離開，足球就係咁，你永遠唔知道會發生咩事，但我一直都咁講，並會履行承諾。」