錫菲聯擁「溫布萊優勢」　升英超有運行？

下季英超最後一個席位，將會喺周六(24日)晚落實，錫菲聯同新特蘭決戰英冠附加賽決賽，呢場係溫布萊球場上演嘅終極戰，雖然叫做中立場，但錫菲聯就擁有絕大嘅「溫布萊優勢」！

今場決賽，兩隊分別獲發35,000張波飛，不過錫菲聯球迷就被分現喺「行運東看台」。統計顯示，自從2007年喺新溫布萊球場踢英冠附加賽決賽後，除2020年因疫情閉門作賽，其餘17場決賽當中，喺東看台嘅球隊贏咗10次。

呢個數據可能係迷信，不過錫菲聯球員確實有更豐富溫布萊經驗，洛賀丁、咸沙祖靴里同哈利遜布魯斯都喺呢個球場捧過盃，古斯達禾咸馬同卡林奧哈利之前踢高雲地利，亦喺新溫布萊入過波，領隊韋達表示：「我都唔使點幫佢哋，大家都好專注，備戰簡直完美，球隊依家充滿能量，我哋要將佢帶入球場。」