施洛證實　高普出席英超冠軍頒獎禮

周日英超煞科，利物浦對水晶宮將會安排冠軍頒獎儀式，主帥施洛證實，前領隊高普將會重臨晏菲路球場，出席冠軍頒獎禮，官方公布頒獎嘉賓就係8、90年代利物浦隊長阿倫漢臣。

今次頒獎禮，係利物浦球迷35年來首次在主場見證愛隊捧盃場面，因為5年前利物浦奪冠時，遇上新冠肺炎疫情，利物浦時任主帥高普只能閉門捧盃，當時並無觀眾，今次高普可以獲得補償。

施洛表示：「聽講佢(高普)會嚟，我感到自豪同特別，自豪可以概括我感受，執教1年，我深知呢座獎盃嘅分量，呢個係最難贏嘅冠軍。」

現擔任紅牛足球集團全球總監嘅高普，周五(23日)已返回利物浦市，先以利物浦基金會榮譽大使身份出席利物浦大教堂嘅慈善晚宴，到周日比賽對水晶宮期間入場觀戰，雖然官方未有安排高普參與頒獎禮環節，但到時電視台鏡頭必定會影實高普。

至於頒獎儀式，將會由8、90年代利物浦隊長、69歲嘅阿倫漢臣擔任嘉賓，將冠軍獎盃交畀現役隊長華基爾雲迪積克。1990年利物浦贏得英甲聯賽冠軍，正係由阿倫漢臣高舉獎盃。