好玩得！貝迪斯宣布歐協聯決賽用雀鳥會章

熱刺奪得歐霸盃冠軍後，有網民發現今季英超4支球隊會章都同雀鳥有關，即將出戰歐協聯決賽嘅貝迪斯官方立即跟風，「官宣」將貝迪斯出戰歐協聯嘅會章，修改為雀鳥圖案，希望「邪住」車路士，一舉捧盃。

今季4支英超捧盃球隊計有利物浦贏英超、水晶宮贏足總盃、紐卡素贏聯賽盃，同埋熱刺贏歐霸盃，4隊會章都有雀鳥圖案，其實除咗4支英超隊，荷甲嘅伊高斯(又名前進鷹)最近捧走荷蘭盃，一樣同雀鳥有關。

歐協聯決賽貝迪斯對車路士，兩隊都同雀鳥無關，但係貝迪斯反應快，喺熱刺贏得歐霸盃冇耐就宣布，歐協聯決賽貝迪斯會使用新logo，就係將會章中間原本個B字圖案，改成一隻雀仔。

喺會章加隻雀仔，似乎有助增強運氣，球迷反應都好正面，認為貝迪斯個「小編」好玩得。