A米成績差惹公憤　3000球迷包圍總部示威

意甲老牌球會AC米蘭今季成績令人失望，未能打入前6位，兼失落意大利盃錦標，相隔5年再次無緣歐洲賽，惹起球迷強烈不滿，約有3,000人喺周六(24日)晚包圍A米球會總部示威，要求多位高層下台，連擔任高級顧問嘅名宿伊巴謙莫域亦不能幸免。

根據意大利傳媒報道，約有3,000名A米球迷喺香港時間周六(24日)晚11點，包圍A米球會總部，舉行示威活動，目標直指球會會長保羅史卡朗尼、行政總裁富蘭尼、技術總監蒙卡達、高級顧問伊巴謙莫域，批評呢班高層無能，導致球隊成績差劣，應該引咎辭職。

球迷嘅怒火由場外燒到場內，AC米蘭喺周日(25日)凌晨聯賽煞科戰主場對蒙沙，主隊擁躉毫不留情，不斷報以噓聲，踢到上半場中段，更加有大批球迷集體離場抗議。

AC米蘭球員都知衰，下半場發力，憑馬迪奧加比亞、祖奧菲歷斯各入1球，以2比0擊敗蒙沙，賽後馬迪奧加比亞公開向球迷道歉，希望大家向前看，有信心球隊下季可以捲土重來。