拿玻里重新斟介加拿祖　轉會費可達5.3億

近日同主帥魯賓艾摩廉關係惡化嘅曼聯翼鋒阿歷真度加拿祖，煞科戰對阿士東維拉連後備都冇，今夏離隊呼聲甚高，據報拿玻里打算重新斟介該阿根廷小將，轉會費有機會達到5,000萬鎊(約5.3億港元)。

英國傳媒報道，加拿祖在歐霸盃決賽僅上陣20分鐘，賽後批評艾摩廉排陣，引發雙方矛盾，日前艾摩廉通知加拿祖可以離隊，呢邊廂拿玻里就有所行動，打算重啟斟介加拿祖談判。

拿玻里總監曼納將於今個星期同曼聯進行談判，商討簽入加拿祖。早在今年1月，拿玻里曾嘗試報價4,000萬鎊求購，甚至加拿祖都疑似向主場球迷告別，但最終遭曼聯拒絕，轉會傾唔成。

雖然加拿祖今次亞洲行仍然隨隊，但佢嘅曼聯生涯相信接近完結，曼聯出售加拿祖嘅心理價位係6,000萬鎊，不過消息人士指出，由於艾摩廉急於套現以實行組軍計劃，因此轉會費可以調整至5,000萬鎊。

車路士亦對加拿祖有興趣，但拿玻里已經有實際行動，喺呢場爭奪戰暫時佔上風。