一出一入　曼聯賣加拿祖買麥比奧莫

曼聯鋒線大改造，繼即將簽入狼隊前鋒馬菲奧斯根夏後，又準備出手收購賓福特射手麥比奧莫，根據英國《太陽報》爆料，紅魔鬼計劃以5,000萬鎊(約5.3億港元)出售阿歷真度加拿祖，然後用呢筆資金買麥比奧莫。

曼聯領隊魯賓艾摩廉想賣走加拿祖，已經成為公開秘密，盛傳拿玻里、馬體會有興趣接貨，會方要為呢位20歲阿根廷國腳搵買家，並唔困難，希望從中獲得5,000萬鎊轉會費收入。

與此同時，據悉曼聯周一(26日)已經接觸賓福特，提出收購麥比奧莫，呢位25歲喀麥隆國腳只剩下1年合約，估計身價為5,000萬鎊，紅魔鬼正好可以用出售加拿祖嘅收入，收購麥比奧莫。

賓福特領隊法蘭克近日承認留唔住麥比奧莫：「好多球會對麥比奧莫有興趣，我想留住佢，但賓福特一向屬於『賣方』，如果價錢合理，我哋就會出售。」麥比奧莫已效力賓福特6季，今季表現大爆發，英超上陣38場入20球及7次助攻，排射手榜第4位，如果曼聯簽到佢，應該可以大幅提升攻力。