意大利公布名單　集齊意甲射手榜前3位神鋒

意大利國家隊主帥史巴列堤公布27人大軍名單，陣容精銳盡出，今季意甲射手榜前3位球員列迪古、摩斯堅恩、柯蘇連尼全部入選，擺大個頭出戰6月2場世界盃外圍賽對挪威、摩爾多瓦。

意大利近年鋒線人才凋零，幸好土炮前鋒今季大踢爭氣波，阿特蘭大射手列迪古以25球獲得意甲金靴獎，費倫天拿前鋒摩斯堅恩以19球排第2位，博洛尼亞翼鋒柯蘇連尼同阿特蘭大嘅尼日利亞國腳盧卡文，同樣有15球並列第3位。

此外，烏甸尼斯前鋒羅倫素盧卡亦有12球進帳，呢位身高2米01嘅「長人」都有入選意軍名單，領隊史巴列堤現時終於有一手鋒線「好牌」。

防線方面，維羅納中堅迪亞高哥普拿首次入選，呢位21歲新星身高1米92，制空力強，今季意甲上陣32場，並有2球進帳。至於上場意甲煞科戰有波入嘅AC米蘭中堅馬迪奧加比亞、祖雲達斯中場文路爾盧卡迪利都有入選。

意大利將於6月7日凌晨世盃外作客挪威，3日之主場對摩爾多瓦。