迪基亞成搶手貨　下季可望再戰歐聯

迪基亞上年夏天加盟費倫天拿之後，表現愈戰愈勇，現時更加成為搶手貨，根據「轉會權威」記者羅曼諾(Fabrizio Romano)爆料，法甲勁旅摩納哥計劃簽入呢位34歲西班牙鋼門，如果成事，佢下季可以重返歐聯比賽。

迪基亞僅同費倫天拿簽約1年，雖然雙方有優先權續約多1年，但仍然未落實，法甲季軍摩納哥乘虛而入，希望簽入呢位擁有豐富大賽經驗嘅老將，協助球隊出戰下屆歐聯。

費倫天拿亦不敢怠慢，準備向迪基亞開出新合約，想同佢續約至2028年6月。費倫天拿今季意甲排第6位，下季只可以參加歐協聯，論吸引力比唔上歐聯份子摩納哥，至於佢最終會點揀，大家拭目以待。

另外，摩納哥已經接近簽入巴塞隆拿前鋒安素法迪，據悉會以先借後買方式完成交易。