車路士「有權」揀踢歐霸？高爾彭馬獎金縮水

車路士喺英超煞科日順利搶到前5名，成功獲得下季歐聯入場券，不過如果佢哋贏埋歐協聯冠軍，根據歐洲足協條例，車路士需要「選擇」繼續踢歐聯，或者以歐協聯冠軍身份踢歐霸盃，唔少球迷都話條條例「多舊魚」。

車路士如果真係有得揀，99.9%會踢獎金豐厚嘅歐聯，但歐洲足協條例嘅原意，係保障其他小國聯賽球會。因為如果歐協聯冠軍係由二、三線聯賽冠軍球隊贏得，佢哋嘅歐聯資格只係外圍賽，萬一輸波出局就乜都冇，反而踢歐霸盃可以直入正賽，所以對於小國球會嚟講，呢個「選擇權」係有必要存在。

另外，車路士如果贏得歐協聯冠盃，將獲590萬鎊冠軍獎金，不過王牌球星高爾彭馬嘅獎金就會「低人一等」，事關車路士嘅獎金分配，係根據出場次數決定，高爾彭馬喺聯賽階段並冇註冊，今屆賽事只踢過3次正選同4次後備上陣，相比起達斯貝利賀爾13次正選同1次後備上陣，高爾彭馬獎金會少一大截。