好波有好報！艾斯高相隔6年重返「鬥牛兵團」

西班牙國家隊主帥富安迪公布出戰歐國聯嘅大軍名單，出現令人驚喜名字，闊別「鬥牛兵團」6年嘅艾斯高獲重召。呢位33歲老將今季表現大翻身，協助貝迪斯打入歐協聯決賽，現時更加重返國家隊，獲得事業第二春。

艾斯高2022年夏天離開效力咗9年嘅皇馬，轉投西維爾，但因為表現差，僅1季就離隊。艾斯高加盟貝迪斯後，事業開始有起色，呢位中場上季為貝迪斯上陣36場入9球，今季32次披甲有12球進帳及10次助攻，重拾顛峰水準。

艾斯高以隊長身份率領貝迪斯獲得西甲第6位，可以參加下屆歐霸盃，並已進身今屆歐協聯決賽，佢獲「鬥牛兵團」徵召，絕對係眾望所歸，如果保持狀態，隨時可以參加明年世界盃。

西班牙將於6月6日凌晨出戰歐國聯4強對法國，力爭衞冕呢項錦標。