最後通牒　般費周四決定去留

曼聯隊長般奴費南迪斯去留問題備受關注，根據英國《每日郵報》爆料，沙特阿拉伯豪門希拉爾向呢位30歲葡萄牙國腳發出最後通牒，必須於周四(29日)或之前決定是否加盟，如果交易成事，曼聯可以獲得1億鎊(約10.6億港元)巨額轉會費收入，有助舒緩財政壓力。

希拉爾將出戰下月世冠盃，計劃簽入巨星幫手爭取佳績，首選般奴費南迪斯，願意向曼聯開出1億鎊轉會費，並向般費提供一份70萬鎊(約740萬港元)周薪免稅合約，遠高於佢現時28萬鎊周薪。

世冠盃將於6月14日至7月13日喺美國舉行，希拉爾首仗將於6月19日對皇馬，距離開賽日子愈來愈近，呢支沙特勁旅要求般奴費南迪斯周四(29日)或之前決定是否接受合約。

曼聯領隊魯賓艾摩廉表示，希望呢位主將留隊：「般奴對於我哋非常重要，重建球隊過程，佔有重要角色。」由於曼聯無緣下屆歐洲賽，令財政問題雪上加霜，有需要出售球員套現，般奴費南迪斯早前話，如果球會有需要，可以出售佢，希拉爾開出天價轉會費及薪酬，的確有機會令紅魔鬼放人。