安東尼「以德報怨」　捧盃有獎金益曼聯

貝迪斯將於周四(29日)凌晨歐協聯決賽對車路士，根據西班牙傳媒報道，如果安東尼馬菲奧斯協助貝迪斯奪冠，根據借用條款，曼聯可以獲得30萬鎊(約320萬港元)獎金。

安東尼馬菲奧斯今年1月底被曼聯外借去貝迪斯後，獲得重生，上陣25場入9球及5次助攻，包括歐協聯入4球及3次助攻，成為球隊打入決賽嘅大功臣。

西班牙傳媒指貝迪斯借用安東尼嘅條款之中，包括如果佢喺歐洲賽為貝迪斯上陣一半賽事，並獲得冠軍，呢支西甲球隊需要向紅魔鬼支付額外30萬鎊。

安東尼效力曼聯期間鬱鬱不得志，估唔到依家可能「以德報怨」送錢畀紅魔鬼。貝迪斯教練比歷連尼表示，安東尼之所以落力爭取表現，目的係向曼聯「報仇」證明實力，會方都好希望留住佢，但實在難以負擔高昂轉會費。