曼聯10號留畀根夏　福仔歸隊無望

曼聯即將簽入狼隊前鋒馬菲奧斯根夏，根據英國媒體《talkSPORT》爆料，紅魔鬼打算將下季10號球衣交畀呢位巴西國腳，意味原本10號波衫主人拉舒福特歸隊無望。

馬菲奧斯根夏現時着狼隊10號，呢個號碼屬於已故巴西球王比利嘅金漆招牌，對於森巴球員別具意義，根夏成「魔」後都希望繼續着10號。

曼聯過往10號仔都極具級數，包括神鋒雲尼斯達萊、朗尼，拉舒福特2018年繼承呢件戰衣，可惜演出同各位前輩相距甚遠。「福仔」被外借去阿士東維拉後，曼聯10號懸空，會方一旦今夏成功將佢出售，就會將10號交畀馬菲奧斯根夏。

根據「轉會權威」記者羅曼諾(Fabrizio Romano)爆料，西甲冠軍巴塞隆拿仍然有興趣簽入拉舒福特，曼聯要求4,000萬鎊(約4.2億港元)轉會費，只要任何球會出到呢個價錢，就可以帶走「福仔」。