迪布尼接班人　曼城加入爭奪卓基

曼城中場大腦奇雲迪布尼今夏約滿離隊，會方正在積極物色接班人，根據英國《電訊報》爆料，「藍月亮」加入爭奪里昂主將卓基，同另外兩大英超豪門車路士、利物浦展開搶人才大戰。

卓基出身於里昂青訓系統，今季表現一鳴驚人，為里昂各項賽事上陣44場射入12球及20次助攻，包括歐霸盃8強兩回合對曼聯，都有波入，雖然里昂最終出局，但卓基仍然獲得多間大球會垂青，車路士、利物浦早已睇中佢。

呢位21歲法國新星只剩下1年合約，加上合約內有2,000萬鎊(約2.1億港元)買斷條款，其他球會可以用呢個價錢直接收購佢，對於曼城等大球會而言，呢個數目實在濕濕碎，里昂想留住卓基非常困難，現時主要睇佢想加盟邊一隊。

除咗卓基之外，曼城仲有2位人選，包括AC米蘭中場雷恩達斯、諾定咸森林嘅英格蘭國腳基比斯韋特。