貝迪斯宿敵抽水　會長寸爆回應

貝迪斯失落歐協聯錦標之後，同市宿敵西維爾趁機抽水，祝賀車路士奪得冠軍，貝迪斯會長安祖加西亞亦不甘示弱，「祝賀」西維爾今季西甲護級成功，暗寸對方成績差，冇資格說三道四。

車路士領隊馬利斯卡球員時代曾於2005至09年效力西維爾，協助球隊奪得2次歐霸盃冠軍，呢位45歲意大利少帥今次捧盃，西維爾官方社交網不忘恭喜呢位昔日舊將：「恭賀我哋親愛嘅馬利斯卡，贏得教波生涯首個歐洲賽冠軍。」

言者無心，聽者有意，貝迪斯傳統上同西維爾水火不容，難免認為對方祝賀馬利斯卡，別有用意。貝迪斯會長安祖加西亞被傳媒問到今次事件時，佢話：「我對於佢哋發動挑釁不感興趣，我哋要專注工作，為下季做好準備，我亦祝賀西維爾今季西甲護級成功。」西維爾今季聯賽排尾四，以1分優勢力壓尾三嘅雷加利斯，驚險保住西甲席位。

另外，雖然貝迪斯輸波，但教練比歷連尼仍然創下一項紀錄，以71歲零254日成為歐洲賽決賽史上最大年齡主帥。