史上首次！英格蘭球隊「五福臨門」

車路士奪得歐協聯冠軍之後，出現歷史性一幕，根據OPTA統計，史上首次同季有5支英格蘭球隊奪得頂級賽事冠軍，可以話係皆大歡喜。

首先紐卡素3月爆冷擊敗利物浦，奪得英聯盃冠軍，打破70年國內頂級賽事錦標荒，另1支「奇兵」水晶宮仲犀利，捧英足盃冠軍，勇奪創會近120年首個大賽冠軍。至於利物浦提早4輪成為英超盟主，累積第20次奪得頂級聯賽冠軍。

歐洲賽方面，熱刺上周捧歐霸盃，加上車路士成為歐協聯冠軍，換言之今季20支英超球隊之中，四份一球隊有盃落袋，美中不足係歐聯決賽冇英超球隊。

值得一提，車路士今場歐協聯決賽正選陣容，最大年齡球員古古列拿只係26歲，成為繼1979年之後，歐洲賽決賽史上第2次出現一支球隊正選陣容冇27歲或以上球員，可見車仔人腳非常年輕，大把前途。