摩連奴即將被費倫巴治辭退　解約金商議中

今季出山執教費倫巴治嘅摩連奴，未能取得任何錦標，四大皆空，據報費倫巴治準備將佢辭退，雙方商討解約金，摩dad最高可獲1,400萬歐元賠償(約1.23億港元)。

摩連奴去年夏天執教費倫巴治，當時雙方簽約2年，年薪1,050萬歐元，但估唔到2年約都捱唔到，呢位葡萄牙名帥喺土超重現「寸王」本色，炮轟球證同對手，甚至喪鬧土耳其足總有「黑幕」，搞到連球迷都唔鍾意佢，希望佢快啲走。

土耳其傳媒報道，費倫巴治高層正同摩連奴商討解約，解約金1,400萬歐元，費倫巴治唔想畀咁多，但摩連奴表明要賠足，雙方仍在拉鋸。

62歲嘅摩連奴離開土超後大把出路，據報葡萄牙足總想搵佢接手國家隊出戰明年世界盃，而沙特聯賽亦對摩dad有興趣。