般費經理人沙特現身　希拉爾70萬鎊周薪挖角

正喺香港進行亞洲之旅嘅曼聯，下季面臨失去隊長般奴費南迪斯。據沙特傳媒報道，般費嘅經理人周三(29日)喺利雅得現身，喺酒店同希拉爾高層會面商討轉會，消息指希拉爾願意開出70萬鎊周薪，並要求般費喺今個周末前作出決定。

中東著名記者Ismael Mahmoud報道，般費嘅經理人賓奴周三喺利雅得嘅四季酒店現身，呢間酒店位於希拉爾總部附近，亦係球會傾談轉會嘅慣常地點。據報希拉爾開出3年合約，將般費人工由目前28萬鎊周薪，大幅增加到70萬鎊周薪，談判進展理想。

報道指希拉爾要求般費喺72小時內作出決定，如果佢同意轉會，希爾拉就會向曼聯開出1億鎊轉會費「搶人」。曼聯領隊魯賓艾摩廉近期多次強調，般費係球隊重要一只，一定唔會畀佢走，不過隨住曼聯下季失去歐洲賽資格，為穩固財政可能亦會被迫放人。