【官宣】無懼死亡恐嚇　迪馬利亞回歸母會

阿根廷球星迪馬利亞同賓菲加約滿後，周四(30日)正式同阿甲球會羅沙里奧中央簽約，相隔18年後再次返到母會懷抱。37歲嘅迪馬利亞其實上年已經想回歸阿甲，但因為受到死亡恐嚇令轉會告吹，今次終於夢想成真。

迪馬利亞20年前喺羅沙里奧中央出道，2007年轉投賓菲加展開歐洲生涯，18年來效力過皇家馬德里、曼聯、巴黎聖日耳門、祖雲達斯等豪門，獲得超過30個錦標，去到生涯尾聲走返回頭路，2年前重投賓菲加，依家再返母會效力。羅沙里奧中央官方影片表示：「歡迎回家！我哋共同嘅歷史，仲有好多篇章等待書寫。」

迪馬利亞上年夏天已經打算重返羅沙里奧中央，不過當時阿根廷販毒同暴力問題嚴重，迪馬利亞更收到附有子彈嘅「豬頭包裹」，恐嚇信內指若果迪馬利亞重返羅沙里奧中央，粒子彈就會喺佢個女兒額頭，最終迪馬利亞取消轉會決定。