【官宣】皇馬提早簽入阿諾特　利物浦有錢收

皇家馬德里及利物浦周五(30日)官方宣布，阿歷山大阿諾特由利物浦轉投皇馬，由於今次轉會提早咗1個月，所以利物浦有錢收，據報皇馬支付補償金係1,000萬鎊(約1.05億港元)，但亦有另一版本係1,000萬歐元(約8,890萬港元)。

阿諾特同利物浦合約6月30日到期，其實皇馬乜都唔使做，7月1日就可以免費得到阿諾特，不過世冠盃舉行在即，新主帥沙比阿朗素希望帶埋阿諾特出戰，所以皇馬向利物浦支付一定金額，而利物浦在官網宣布接納皇馬條件，提早放人。

至於皇馬向利物浦畀咗幾多錢，共有兩個版本，英國傳媒指皇馬支付1,000萬鎊補償金，「轉會專家」羅曼諾則報道，皇馬支付嘅補償金係1,000萬歐元。無論皇馬畀幾多，都唔係少數目，阿諾特總算為母會利物浦爭取到一點回報。