希亞路極力挽留：簽C朗係國家項目

葡萄牙巨星C朗拿度早前在沙職聯賽煞科戰後發文表示「章節已完」，暗示打算離開艾納斯，艾納斯總監希亞路為此召開記者會，表示簽入C朗係「國家項目」，會盡最大努力挽留同傾續約。

希亞路表示：「簽入C朗係國家項目，佢係足球史上偉大現象，並為沙職聯賽發展作出貢獻，C朗合約將於6月30日到期，雙方正進行談判，希望能繼續合作。」

傳出C朗離隊後，艾納斯宿敵希拉爾曾出手搶人，而墨超蒙特雷，以及巴甲多隊都對C朗有興趣，沙特傳媒報道，C朗已拒絕希拉爾斟介，轉投墨超或巴甲亦機會不大，同艾納斯續約似乎係唯一選擇。

為咗挽留C朗，艾納斯已收回減薪方案，開出2年新約，年薪照舊2億歐元(約17.6億港元)，C朗為爭取達到生涯1,000球，加上睇錢份上，留低都唔奇。