有入有出　路易斯迪亞斯或轉投艾納斯

利物浦簽入謝利美費林邦，但面臨鋒線主力路易斯迪亞斯離隊，根據「轉會權威」記者羅曼諾(Fabrizio Romano)爆料，西甲冠軍巴塞隆拿及沙特阿拉伯豪門艾納斯，都計劃收購呢位28歲哥倫比亞國腳。由於紅軍同路易斯迪亞斯續約談判陷入僵局，唔排除趁機出售佢。

艾納斯近期頻頻向利物浦球員埋手，曾於今年1月想收購達雲紐尼斯，但未能成事，現時改打路易斯迪亞斯主意。呢位前鋒剩下2年合約，周薪只有5.5萬鎊，要求大幅增加至15萬鎊周薪，先至肯續約，但利物浦會方僅願意開出12萬鎊周薪，導致一直傾唔掂數。

艾納斯財力雄厚，可以滿足路易斯迪亞斯人工要求，值得一提，另1位哥倫比亞國腳祖漢杜蘭今年1月由阿士東維拉轉投艾納斯，獲得32萬鎊周薪，如果迪亞斯願意加盟艾納斯，相信可以獲得更高薪酬。

至於巴塞隆拿希望簽入路易斯迪亞斯，提升實力爭奪下屆歐聯錦標，但論薪酬待遇，肯定比唔上艾納斯，依家就睇路易斯迪亞斯到底向錢看，抑或想留喺歐洲踢頂級賽事。