戴納拒投曼聯真相曝光　原來係杜曹搞事

曼聯原本已經同葉士域治射手利安戴納傾得七七八八，準備簽入呢位22歲新星，但戴納突然改變主意，選擇加盟車路士，根據英國《太陽報》爆料，原來係英格蘭主帥杜曹從中作梗，勸利安戴納上「車」，增加入選國家隊機會。

葉士域治降班後，利安戴納嘅3,000萬鎊(約3.2億港元)解約條款生效，曼聯願意出手買斷佢，甚至已同經理人傾好待遇條款，但利安戴納最終選擇上「車」，杜曹發揮關鍵作用。

據悉杜曹對於曼聯3年前選擇搵坦哈格執教，而唔揀佢領軍，令呢位德國名帥耿耿於懷，所以作出「復仇」，告知利安戴納加盟車路士，比較有利入選英格蘭，甚至可以踢明年世界盃決賽周，結果令戴納拒絕曼聯、諾定咸森林、愛華頓等球隊邀請，一心只想上「車」。

事實上，撇開「復仇」因素，杜曹鍾情於舊東家車路士球員，今次徵召「三獅兵團」名單就有5位「車手」，利安戴納為進身大國腳，選擇加盟車路士，亦無可厚非。