世冠盃收入和味　皇馬超豪獎金爭冠

西甲豪門皇家馬德里今季失落歐聯、聯賽錦標，甚至西班牙盃都拎唔到，「銀河艦隊」現時將目標放喺6月中展開嘅世冠盃，根據西班牙《阿斯報》爆料，如果皇馬奪冠，可以獲得1.4億歐元(約12.5億港元)收入，會方為激勵球員搏盡，開出每人100萬歐元(約890萬港元)冠軍獎金。

國際足協將為今屆賽事，豪派9.3億歐元獎金，皇馬以歐聯冠軍身份參賽，已經可穩袋3,500萬歐元，由16強至決賽，每晉一級都有獎金，包括冠軍有3,700萬歐元。如果「銀河艦隊」可以成為最終王者，累積總獎金可達到1.4億歐元，非常和味，所以會方願意向球員開出超豪獎金，以提升士氣，意味由利物浦來投嘅阿歷山大阿諾特，都有機會瓜分獎金。

另外，皇馬計劃提早同後衞阿拉巴解約，向佢支付500萬歐元補償，以節省1,500萬歐元薪酬出支。